Shri Hanuman Chalisa

दोहा श्रीगुरु चरन सरोज रज, निज मनु मुकुरु सुधारि । बरनउँ रघुबर बिमल जसु, जो दायकु फल चारि ॥ बुद्धिहीन तनु जानिके, सुमिरौं पवन कुमार । बल बुधि बिद्या देहु मोहिं, हरहु कलेस बिकार ॥ चौपाई जय हनुमान ज्ञान गुन सागर । जय कपीस तिहुँ लोक उजागर ॥ १ ॥ राम दूत अतुलित बल धामा । अंजनि पुत्र पवनसुत नामा ॥ २ ॥ महाबीर बिक्रम बजरंगी । कुमति निवार सुमति के संगी ॥ ३ ॥ कंचन बरन बिराज सुबेसा । कानन कुंडल कुंचित केसा ॥ ४ ॥ हाथ बज्र औ ध्वजा बिराजै । काँधे मूँज जनेऊ साजै ॥ ५ ॥ शंकर सुवन केसरीनंदन । तेज प्रताप महा जग बंदन ॥ ६ ॥ विद्यावान गुनी अति चातुर । राम काज करिबे को आतुर ॥ ७ ॥ प्रभु चरित्र सुनिबे को रसिया । राम लखन सीता मन बसिया ॥ ८ ॥ सूक्ष्म रूप धरि सियहिं दिखावा । बिकट रूप धरि लंक जरावा ॥ ९ ॥ भीम रूप धरि असुर सँहारे । रामचंद्र के काज सँवारे ॥ १० ॥ लाय सजीवन लखन जियाये । श्रीरघुबीर हरषि उर लाये ॥ ११ ॥ रघुपति कीन्ही बहुत बड़ाई । तुम मम प्रिय भरतहि सम भाई ॥ १२ ॥ सहस बदन तुम्हरो जस गावैं । अस कहि श्रीपति कंठ लगावैं ॥ १३ ॥ सनकादिक ब्रह्मादि मुनीसा । नारद सारद सहित अहीसा ॥ १४ ॥ जम कुबेर दिगपाल जहाँ ते । कबि कोबिद कहि सके कहाँ ते ॥ १५ ॥ तुम उपकार सुग्रीवहिं कीन्हा । राम मिलाय राज पद दीन्हा ॥ १६ ॥ तुम्हरो मंत्र बिभीषन माना । लंकेस्वर भए सब जग जाना ॥ १७ ॥ जुग सहस्त्र जोजन पर भानू । लील्यो ताहि मधुर फल जानू ॥ १८ ॥ प्रभु मुद्रिका मेलि मुख माहीं । जलधि लाँघि गये अचरज नाहीं ॥ १९ ॥ दुर्गम काज जगत के जेते । सुगम अनुग्रह तुम्हरे तेते ॥ २० ॥ राम दुआरे तुम रखवारे । होत न आज्ञा बिनु पैसारे ॥ २१ ॥ सब सुख लहै तुम्हारी सरना । तुम रच्छक काहू को डर ना ॥ २२ ॥ आपन तेज सम्हारो आपै । तीनों लोक हाँक तें काँपै ॥ २३ ॥ भूत पिसाच निकट नहिं आवै । महाबीर जब नाम सुनावै ॥ २४ ॥ नासै रोग हरै सब पीरा । जपत निरंतर हनुमत बीरा ॥ २५ ॥ संकट तें हनुमान छुड़ावै । मन क्रम बचन ध्यान जो लावै ॥ २६ ॥ सब पर राम तपस्वी राजा । तिन के काज सकल तुम साजा ॥ २७ ॥ और मनोरथ जो कोई लावै । सोइ अमित जीवन फल पावै ॥ २८ ॥ चारों जुग परताप तुम्हारा । है परसिद्ध जगत उजियारा ॥ २९ ॥ साधु संत के तुम रखवारे । असुर निकंदन राम दुलारे ॥ ३० ॥ अष्ट सिद्धि नौ निधि के दाता । अस बर दीन जानकी माता ॥ ३१ ॥ राम रसायन तुम्हरे पासा । सदा रहो रघुपति के दासा ॥ ३२ ॥ तुम्हरे भजन राम को पावै । जनम जनम के दुख बिसरावै ॥ ३३ ॥ अंतकाल रघुबर पुर जाई । जहाँ जन्म हरिभक्त कहाई ॥ ३४ ॥ और देवता चित्त न धरई । हनुमत सेइ सर्ब सुख करई ॥ ३५ ॥ संकट कटै मिटै सब पीरा । जो सुमिरै हनुमत बलबीरा ॥ ३६ ॥ जय जय जय हनुमान गोसाईं । कृपा करहु गुरुदेव की नाईं ॥ ३७ ॥ जो सत बार पाठ कर कोई । छूटहि बंदि महा सुख होई ॥ ३८ ॥ जो यह पढ़ै हनुमान चालीसा । होय सिद्धि साखी गौरीसा ॥ ३९ ॥ तुलसीदास सदा हरि चेरा । कीजै नाथ हृदय महँ डेरा ॥ ४० ॥ दोहा पवनतनय संकट हरन, मंगल मूरति रूप । राम लखन सीता सहित, हृदय बसहु सुर भूप ॥

śrī guru charana saroja raja, nija manu mukuru sudhāri | baranau raghubara bimala jasu, jo dāyaku phala chāri || buddhihīna tanu jānike, sumirau pavana kumāra | bala budhi bidyā dehu mohiṁ, harahu kalesa bikāra || jaya hanumāna jñāna guna sāgara | jaya kapīsa tihuṁ loka ujāgara || 1 || rāma dūta atulita bala dhāmā | añjani putra pavana sūta nāmā || 2 || mahābīra vikrama bajarangī | kumati nivāra sumati ke sangī || 3 || kañchana barana birāja subesā | kānana kuṇḍala kunīchita kesā || 4 || hātha bajra au dhvajā birājai | kāndhe mūnja janeū sājai || 5 || śaṅkara suvana kesarīnandana | teja pratāpa mahā jaga bandana || 6 || vidyāvāna gunī ati chātura | rāma kāja karibe ko ātura || 7 || prabhu charitra sunibe ko rasiyā | rāma lakhana sītā mana basiyā || 8 || sūkṣma rūpa dhari siyahiṁ dikhaāvā | vikaṭa rūpa dhari laṅka jarāvā || 9 || bhīma rūpa dhari asura sanhāre | rāmachandra ke kāja sanvāre || 10 || lāya sanjīvana lakhana jiyāye | śrī raghubīra haraṣi ura lāye || 11 || raghupatī kīnhī bahuta baḍāī | tuma mama priya bharatahi sama bhāī || 12 || sahasa badana tumharo jasa gāvaiṁ | asa kahi śrīpati kantha lagāvaiṁ || 13 || sanakādika brahmādi munīsā | nārada sārada sahita ahīsā || 14 || jama kubera digapāla jahāṁ te | kabi kobida kahi sake kahāṁ te || 15 || tuma upakāra sugrīvahiṁ kīnhā | rāma milāya rāja pada dīnhā || 16 || tumharo mantra bibhīṣana mānā | laṅkeśvara bhae saba jaga jānā || 17 || juga sahasra jojana para bhānū | līlyo tāhi madhura phala jānū || 18 || prabhu mudrikā meli mukha māhīṁ | jaladhi lānghi gaye acharaja nāhīṁ || 19 || durgama kāja jagata ke jete | sugama anugraha tumhare tete || 20 || rāma duāre tuma rakhavāre | hota na ājnā binu paisāre || 21 || saba sukha lahai tumhārī saranā | tuma rachchhaka kāhū ko ḍara nā || 22 || āpana teja samhāro āpai | tīnoṁ loka hānka teṁ kānpai || 23 || bhūta pisācha nikaṭa nahiṁ āvai | mahābīra jaba nāma sunāvai || 24 || nāsai roga harai saba pīrā | japata nirantara hanumata bīrā || 25 || sankata teṁ hanumāna chuḍāvai | mana krama bachana dhyāna jo lāvai || 26 || saba para rāma tapasvī rājā | tina ke kāja sakala tuma sājā || 27 || aura manoratha jo koī lāvai | soi amita jīvana phala pāvai || 28 || chāroṁ juga paratāpa tumhārā | hai parasiddha jagata ujiyārā || 29 || sādhu santa ke tuma rakhavāre | asura nikandana rāma dulāre || 30 || aṣṭa siddhi nau nidhi ke dātā | asa bara dīna jānakī mātā || 31 || rāma rasāyana tumhare pāsā | sadā raho raghupati ke dāsā || 32 || tumhare bhajana rāma ko pāvai | janama janama ke dukha bisarāvai || 33 || antakāla raghubara pura jāī | jahāṁ janma haribhakta kahāī || 34 || aura devatā chitta na dharaī | hanumata sei sarba sukha karaī || 35 || sankata kaṭai miṭai saba pīrā | jo sumirai hanumata balabīrā || 36 || jaya jaya jaya hanumāna gosāīṁ | kṛpā karahu gurudeva kī nāīṁ || 37 || jo sata bāra pāṭha kara koī | chūṭahi bandi mahā sukha hoī || 38 || jo yaha paḍhai hanumāna chālīsā | hoya siddhi sākhī gaurīsā || 39 || tulasīdāsa sadā hari cherā | kījai nātha hridaya mahāṁ ḍerā || 40 || pavana tanaya sankata harana, mangala mūrati rūpa | rāma lakhana sītā sahita, hridaya basahu sura bhūpa ||